Պարույր Սևակ | Գաղտնաբացություն


Մտերմուհիս է նաև... գիշերը:

Երբ նա` լանջաբաց նեգրուհու նման,
Ինձ է հանձնըվում
Ու տիրում է ինձ`
Անվերջանալի գրկախառնումից
Ծնվում է ինքը` մեր արշալույսը,
Որ թուխ ու շեկ է`
Որպես խառնածին:

Եվ օրը գրկած, որպես մանուկի,
Երբ քայլում եմ ես հոր հպարտությամբ,
Ասես լեռները, դաշտերն ու մարդիկ
Լուռ նայում են ինձ
Ու միտք են անում,
Թե այսքա՜ն տգեղ-այլանդակ հորից
Ինչպե՞ս է ծնվել մանուկն այս հրաշք...

18.XI.1959թ. 18.XII.1959թ.     
Չանախչի Թիֆլիս

Տես նաև Պարույր Սևակ Բանաստեղծություններ
Պարույր Սևակ | Գաղտնաբացություն Պարույր Սևակ | Գաղտնաբացություն Reviewed by ՏԱՐԸՆԹԵՐՑՈՒՄ on 5:45:00 Rating: 5
Технологии Blogger.