Պարույր Սևակ | Պիտի ծանակվեմ


Գիտե՛մ, վերըստին պիտի ծանակվեմ,
Սակայն ի՜նչ արած,
Չասել չե՛մ կարող,
Որ լռությունը նույնպե՛ս գույն ունի,
Սպիտակ է նա,
Այնքա՜ն սպիտակ,
Որ աչք է շաղվում...

Փառքը համ ունի՝
Թթվաշ ու տտիպ,
Որ ախորժակ է գրգըռում միայն՝
Չտալով հագուրդ...

Խանդը հոտ ունի՝
Այն հոտը արյան,
Որ ցուլերին է կատաղեցընում...

Եվ արյուն ունի նաև նախանձը.
Արյունն այդ սև է,
Ինչպես արյունը միջատ-մրջյունի...

19.XII.1959թ.        
Թիֆլիս

Տես նաև Պարույր Սևակ Բանաստեղծություններ
Պարույր Սևակ | Պիտի ծանակվեմ Պարույր Սևակ | Պիտի ծանակվեմ Reviewed by ՏԱՐԸՆԹԵՐՑՈՒՄ on 21:24:00 Rating: 5
Технологии Blogger.