Պարույր Սևակ | Ծառերն են բացվել

Ծառերն են բացվել, բողբոջել նորից,

Մայիսն է կրկին իջել ձեր այգում.

Բուրմունք է ելնում տամուկ հողերից,

Ծանոթ խայտանքով սիրտս վարակում:

Գանգուր բաղեղն է աճել վերստին,

Փարվել չափարին ծաղկած ձեր այգու,

Կարոտդ է այդպես փարվել իմ սրտին,

Գաղտնիքդ սակայն... լեզուս է փակում:

Գարո՜ւն: Աշխարհում նորից հիմա նա

Ինչ ունի՝ փռե՜լ, բացել է ինքը:

Ինչ լա՜վ է գարնան գաղտնիքն իմանալ,

Երբ թաքուն է մեր... սիրո գաղտնիքը:

22.V.1946թ. 21.VII.1953թ.  

Երևան Նավչալու

Տես նաև Պարույր Սևակ Բանաստեղծություններ