Վերգիլիուս (Պուբլիուս Վերգիլիուս Մարո) | Էնեական

Էնեական / Վերգիլիուս(Պուբլիուս Վերգիլիուս Մարո): Լատ. թարգմ., առաջաբ. և ծանոթագր.՝ Գ. Մուրադյանի և Ա. Թոփչյանի.- Եր.: «Զանգակ», 2018.-568 էջ + 48 էջ ներդիր: 

Գիրքն ընդգրկում է անտիկ գրականության գլուխգործոցներից մեկի՝ Հոմերոսի «Իլիական»-ի  ու «Ոդիսական»-ի հետ «մեծ եռյակը» կազմող գրական երրորդ կոթողի՝ Պուբլիուս Վերգիլիուս Մարոյի (մ.թ.ա. 70-19) «Էնեական»-ի՝ լատիներեն բնագիրից արևելահայերեն առաջին ամբողջական թարգմանությունը՝ ընդարձակ առաջաբանով և ծանոթագրություններով: Արկածալից դեպքերով, բանաստեղծական վառ և նկարեն պատկերներով ու մարդկային հարաբերությունների հուզիչ դրվագներով լի այս երկը, որ պատմում է Հռոմի հիմնադրման առասպելական նախապատմությունը, ընթերցվում է կլանված ուշադրությամբ: Այն հիացմունքի առարկա է եղել թե´ անտիկ աշխարհում, թե´ միջնադարում ու Վերածննդի շրջանում և թե´ նոր ու նորագույն ժամանակներում: Իբրև էպոսի անգերազանցելի նմուշ՝ «Էնեական»-ը շարունակում է մեզ գերել ու առինքնել նաև այսօր:

Կազմի առաջին էջին՝ «Էնեասն ու Ասկանիուսը գալիս են Լատիում» (ձախում սպիտակ խոզն է՝ իր ձագերով), մ.թ. 140-150 թթ. հռոմեական բարձրաքանդակ, Բրիտանական թանգարան (British Museum): Չորրորդ էջին՝ Վատիկանի առաքելական գրադարանի (Biblioteca Apostolica Vaticana) «Հռոմեական Վերգիլիուս» (Vergilius Romanus) ձեռագրի (V դ.) 14r էջը. պատկերված է Վերգիլիուսը, իսկ բնագրի հատվածը «Բուկոլիկներ»-ից է ( Էկլոգ V, 90 և էկլոգ VI, 1-7): Կռնակին՝ Վերգիլիուս (՞), ենթադրաբար՝ նրա կյանքի օրոք կերտված բրոնզե արձանի գլխի մ.թ.ա. I դարի ընդօրինակություն, Կարլսբերգի նոր գլիպտոտեկ (Ny Carlsberg Glyptotek), Կոպենհագեն: