Պարույր Սևակ | Հորդոր

Դիմավորեցեք... կասկա՜ծը: Նա է
Թակում ձեր դուռը:
Նա է, հենց ի՛նքը:
Դիմավորեցեք և մի՛ վախեցեք.
Ես նրան արդեն ընդունել վաղո՜ւց
Եվ մինչև անգամ ճամփել եմ կրկին:
Դիմավորեցեք նրան ծիսաբա՜ր՝
Նոր ու հնօրյա Տերընդառաջո՛վ՝
Ձեր իսկ կրծքի տակ վառելով խարույկ.
Որպեսզի... եթե ընդմիշտ չչքվի,
Ապա գեթ ճեղքվի մութը ձեր հոգու:
Դիմավորեցեք նրան գեթ հիմա՛,-
Ես նրան վաղո՜ւց ճամփել եմ արդեն:
 
Դիմավորեցեք... կասկա՜ծը: Ես իր
Ո՛չ մունետիկն եմ, ո՛չ էլ մարգարեն:
Իր երախտապարտ փրկյա՜լն եմ ես լոկ:
Դիմավորեցե՛ք, քանզի ամենքիս
Լոկ հավա՜տք է պետք, ո՛չ հավատալիք:
Լոկ հավա՜տք է պետք, ո՛չ հավատալիք...


11.II.1963թ. 28.VIII.1965թ.

Երևան Չանախչի


Տես նաև Պարույր Սևակ Բանաստեղծություններ

Պարույր Սևակ | Հորդոր Պարույր Սևակ | Հորդոր Reviewed by ՏԱՐԸՆԹԵՐՑՈՒՄ on 21:16:00 Rating: 5
Технологии Blogger.