Պարույր Սևակ | Աղմկում եմ

Այս ամենը արդյոք ի՞նչ է. 
Խեղճի նվոց ու ճռի՞նչ է, 
         Թե՞ մի ճիչ է 
         Ու մորմոքում 
         Հզոր հոգու: 
Եվ գալիքի աչքում ի՞նչ եմ. 
Ճո՞րտ եմ արդյոք, 
Թե՞ ազատ եմ, 
Հարազա՞տ եմ, 
Թե՞ լոկ բիճ եմ: 
Կենդանաշատ մի հատա՞կ եմ, 
Թե՞ լոկ այնտեղ ննջող խիճ եմ, 
Կախարդում եմ ու մոգո՞ւմ եմ, 
Թե՞... պարզապես աղմըկում եմ: 
 
Եվ իրար հետ դաշնակի՞ց են, 
Թե՞ թշնամի զույգ բանակ են 
Իմ մեջ քանակն ու որակը: 
Եվ ապագա ինչ-որ ժամի 
Ես՝ գազանըս, 
Ես՝ վազանըս, 
Չե՞մ շորորա ու չե՞մ քայլի հենափայտով: 
 
Սա 
         Ո՛չ աղքատ ձևանալ է, 
         Ոչ հանաք է.
Հանրահաշվի մի խնդիր է՝ զույգ անհայտով, 
Որ կարող է լուծել միայն ժամանակը: 
Իսկ առայժըմ աղմըկում եմ, 
         Ինչպես ջուրը, 
         Որը ի՞նչ է, 
         Ծո՞վ է, 
         Լի՞ճ է, 
         Թե՞ ճահիճ է.
         Տա՞ք է, 
         Պղտո՞ր, 
         Պաղ ու ջի՞նջ է,- 
         Վերջին հաշվով ջրի համար 
         Միևնույնն է կամ ոչինչ է. 
         Նա հոսում է 
         Ու խոսում է՝ 
         Իր սեփական ձայնը բնա՜վ չլսելով, 
         Ո՛չ ցավ զգում, 
         Ո՛չ էլ սգում՝ 
         Իր գեղեցիկ մահը բնա՜վ չափսոսալով... 
 
         Իսկ առայժըմ աղմըկում եմ. 
         -Գոնե լսե՜ք...

13.XI.1957թ.

Մոսկվա


Տես նաև Պարույր Սևակ Բանաստեղծություններ
Պարույր Սևակ | Աղմկում եմ Պարույր Սևակ | Աղմկում եմ Reviewed by ՏԱՐԸՆԹԵՐՑՈՒՄ on августа 26, 2019 Rating: 5
Технологии Blogger.