Թենեսի Ուիլյամս | Տրամվայ «Ցանկություն» | համառոտ

Գործողությունը տեղի է ունենում Նոր Օռլեանում: «Ցանկություն» սիմվոլիկ անունով տրամվայը քաղաքի ծայրամաս է բերում Բլանշ Դյուբուային, որը կորցրել է տոհմական տունը և եկել է քրոջ՝ Ստելլայի և նրա ամուսնու՝ Սթենլի Կովալսկու մոտ ժամանակավորապես ապաստանելու: Եկել է սպիպտակ զգեստ հագած, իսկ հայտնաբերում է չքավոր պայմաններ: Խոր հիասթափություն է ապրում, հաճախ խմում է: Ծնողներին կորցնելուց հետո Բլանշը ստիպված էր վաճառել տունը: Ստելլան կարեկցում է Բլանշին: Միանգամայն այլ է Սթենլիի վերաբերմունքը: Սա կասկածում է, որ Բլանշը ստիպված էր վաճառել տունը և կարծում է, որ նա յուրացրել է նաև այն դրամը, որը պիտի բաժին հասներ Ստելլային: Կովալսկիների տանը Բլանշը ծանոթանում է փականագործ Միտչի հետ: Սա հիացած է Բլանշով: Սթենլին շարունակում է տհաճություն զգալ Բլանշի հանդեպ, մանավանդ այն բանից հետո, երբ պատահաբար լսում է, թե ինչպես է Բլանշը արտահայտվում իր մասին և անգամ խորհուրդ է տալիս քրոջը հեռանալ իրենից: Սկսում է հետաքրքրվել Բլանշի անցյալով: Ծնողների մահից հետո Բլանշն ամուսնացել է: Ամուսինը մահացել է և նրա մահվան ակամա պատճառ է եղել Բլանշը: Հետագայում նա կարեկցանք է փնտրել բազում անկողիններում:

Գալիս է Բլանշի ծննդյան օրը: Հրավիրել է Միտչին, որը մինչ այդ պրակտիկորեն առաջարկություն է արել նրան: Սթենլին բարձր հայտարարում է կնոջը, որ Միտչը չի գալու, որովհետև նրա աչքերը բացել են և նա գիտի, թե ով է Բլանշը: Ինքն է արել դա և պատմել է Բլանշի անբարո կյանքի մասին: Ստելլան ապշած է ամուսնու դաժանության վրա: Ամուսնությունը կարող էր փրկել Բլանշին: Սթենլին տոմս է «նվիրում» Բլանշին, որպեսզի սա վերադառնա իր հարազատ քաղաքը: Ստելլայի մոտ, որը հղի է, ապրումներից վաղաժամ երկունք է սկսվում: Սթենլին տանում է կնոջը հիվանդանոց:

Բլանշը և Միտչը ունենում են վերջին զրույցը: Միտչն ասում է, որ Սթենլիից լսածը անձամբ է ստուգել: Բլանշը խոստովանում է, որ ապրել է անբարո կյանք, որ մեկը մյուսի ետևից փոխել է սիրեկաններին, սակայն արել է դա մոռացում գտնելու համար: Նա չի ստել Միտչին: Սակայն Միտչն ունակ չէ հասկանալ նրան: Փոխարենը սկսում է պահանջել Բլանշից այն, ինչ նա արել է ուրիշ տղամարդկանց հետ: Վիրավորված Բլանշը վռնդում է նրան:

Երբ Սթենլին տուն է գալիս, Բլանշը հարբած է: Ասում է Սթենլիին, որ եկել էր Միտչը՝ վարդերով և խոսքերով… Սթենլին պայթում է: Ո՞վ է Բլանշը, որ իր համար վարդեր բերեն: Միակ բանը, որ նրանից կարելի է ստանալ, անկողինն է: Որսում է Բլանշին և տանում է ննջարան:

Պատահածից հետո Բլանշի ուղեղը մթագնում է: Ստելլան ամուսնու ճնշման տակ որոշում է հոգեբուժարան տեղավորել քրոջը: Բլանշը անվերջ սպասում է, որ իր ետևից կգա մի միլիոնատեր, իսկ գալիս են բժիշկն ու բուժքույրը: Բժիշկի հանգստացնող խոսքերը համոզում են նրան հետևել իրեն: Բլանշն ասում է, որ իրեն միևնույն է, թե ով է բժիշկը: Ինքը միշտ էլ կախված է եղել առաջին իսկ պատահած մարդու բարությունից: